Русија ќе го разгледа предлогот за триесетдневен прекин на огнот во Украина, изјави денеска портпаролот на Кремљ, Дмитриј Песков.

„Мораме да размислиме за ова. Ова е нов развој на настаните. Имаме свој став“, рече Песков.

Тој истакна дека Киев не одговорил на предлогот на рускиот претседател Владимир Путин за тридневен прекин на огнот за Денот на победата.

„Коалицијата на подготвените“ денеска во Киев го поддржа предлогот за триесетдневен прекин на огнот во Украина, а американскиот претседател Доналд Трамп претходно се закани со санкции ако Путин не се согласи.

Пред споменикот на херојот Горан Стојменовиќ во населеното место Инџиково денеска се оддржа настан за одбележување на 10 годишнината од настаните во кумановско Диво Насеље, кои се случија во 2015 година.

На настанот, како што информираат од општина Гази Баба, пред присутните се обратија министерот за внатрешни работи Панче Тошковски, градоначалникот на општина Гази Баба Бобан Стефковски и член на семејството на Горан Стојменовиќ.

-Никогаш во ниедна страница на македонската историја, нема да избели споменот на кобниот мај пред 10 години, денот кога нашите македонски јунаци, припадници на Министерството за внатрешни работи ги положија своите животи во жестокиот судир за одбрана на нашата татковина, истакна министерот Тошковски.

Градоначалникот Стефковски, нагласи дека Македонија загуби осум свој синови, луѓе со имиња, семејства и соништа.

-Тоа беа луѓе кои облекоа униформа не поради должност, туку поради верба дека Македонија колку и да е мала, заслужува мир, безбедност, а пред и над се достоинство! Нивната жртва не е само симбол на трагедија. Таа е симбол на храброст и љубов кон татковината, изјави Стефковски.

Во знак на длабока почит и сеќавање, по повод 10-годишнината од трагичните настани во Диво Насеље, беа пуштени 8 бели балони кон небото – симбол на чест, мир и благодарност. На секој балон беше испишано името на еден од нашите херои кои го положија својот живот за татковината.

Овој чин е тивка, но моќна порака дека нивната жртва не е заборавена. Белите балони го прободеа небото како симбол на нивната вечна слобода и нашата трајна должност да се сеќаваме. Нека се издигне нашето сеќавање – нека лета нивната храброст, се вели во соопштението.

Индија и Пакистан потврдија дека е договорен прекин на огнот. Прекинот на огнот стапува во сила денеска, објавија светските агенции.

Претходно американскиот претседател Доналд Трамп рече дека Индија и Пакистан се согласија за целосен прекин на огнот, по разговорите со посредство на САД.

„По долга ноќ разговори со посредство на САД, со задоволство објавувам дека Индија и Пакистан се согласија за целосен прекин на огнот веднаш. Им честитам на двете земји за користењето на здрав разум и големата интелигенција“, објави Трамп на мрежата Трут Соушл.

Претседателката на Европската комисија Урсула фон дер Лајен денеска го поддржа предлогот за безусловен 30-дневен прекин на огнот во Украина и порача дека ЕУ е подготвена да воведе дополнителни санкции против Русија, доколку примирјето биде прекршено.

„Топката сега е на теренот на Русија“, напиша Фон дер Лајен на социјалната мрежа „Икс“.

„Подготвени сме да го задржиме силниот притисок врз Русија и да воведеме дополнителни санкции доколку примирјето биде прекршено“, изјави таа.

Францускиот претседател Емануел Макрон повика на директни преговори меѓу Украина и Русија во рамките на 30-дневниот прекин на огнот.

-Ако се постигне примирје од 30 дена, ќе започнеме директни разговори меѓу Украина и Русија. Подготвени сме да помогнеме, изјави Макрон за француските медиуми, предупредувајќи дека ако Москва не го прифати примирјето, ќе има дополнителни „многу построги“ санкции.

Германскиот канцелар Фридрих Мерц, исто така, ја предупреди Русија на сериозни последици доколку го одбие 30-дневниот прекин на огнот и последователните мировни преговори за запирање на војната.

-Ќе има масивно заострување на санкциите и дополнителна поддршка за Украина, вклучувајќи политичка, финансиска и воена помош, изјави Мерц за весникот „Билд“.

Тој истакна дека Соединетите Американски Држави ќе ја поддржат оваа мерка, додавајќи дека трпението на американскиот претседател Доналд Трамп кон рускиот претседател Владимир Путин се намалува во обидите да се стави крај на повеќегодишната војна.

„Топката сега е кај Путин, и тој треба да одговори на овој предлог“, нагласи Мерц.