Бројот на затвореници кои ги загубиле животите во затворите во Албанија наликува на воен биланс, констатира Топ чанел, наведувајќи дека во периодот од јануари 2020 до септември 2025 година, 139 лица ги загубиле животите во ѕидовите на своите ќелии, а 12 извршиле самоубиство.

Според Управта за извршување санкции во првите три месеци од годинава починале петмина осуденици.

-Официјалните податоци ја наведуваат 2024 година како година со најголем број сериозни инциденти во затворите, кога 32 осуденици кои издржувале казни го загубиле животот, при што 31 случај е класифициран како здравствено-поврзан, а еден случај е самоубиство, наведува телевизијата.

Слична состојбата е и во 2023 година, кога од вкупно 25 смртни случаи, 23 биле поврзани со здравствени причини, додека евидентирани се едно самоубиство и еден случај на убиство. И тука, повеќето од жртвите починале од нарушено здравје, што укажува на сериозната здравствена состојба на осудените лица.

Во 2022 година се регистрирани 17 смртни случаи, главно поради здравствени причини, додека се регистрирани и 2 случаи на самоубиство. Во меѓувреме, во 2021 година, од вкупно 19 смртни случаи, 17 се од здравствени причини, а 2 се од самоубиство.

Слична е ситуацијата и во 2020 година, 26 затвореници починале, од кои 21 поради болест, а 5 случаи се самоубиства. Минатата година, за период од 9 месеци, регистрирани се 15 смртни случаи, од кои 14 се поврзани со здравствени причини, а еден случај е самоубиство.

Податоците јасно покажуваат дека главниот проблем во затворскиот систем останува здравјето на затворениците, со голем број смртни случаи што се јавуваат како резултат на болест. Од друга страна, иако во помал број, случаите на самоубиства остануваат уште еден аларм за институциите. Алармантна е ситуацијата и со лица заразени со СИДА во затворите чиј бројот се зголемува, наведува Топ чанел.

Според статистиката албанските затвори се преполни, земјата е четврта во Европа со над 180 затвореници на 100 илјади жители.

МИА

– Судскиот процес против израелскиот премиер Бенјамин Нетанјаху по обвиненијата за корупција ќе продолжи в недела, на 12 април, соопшти портпаролот на судската власт. Оваа одлука доаѓа само неколку часа по укинувањето на вонредната состојба во Израел, воведена поради војната против Иран.

„Со укинувањето на вонредната состојба и продолжувањето на работата на правосудството, рочиштата ќе продолжат според вообичаената процедура“, се наведува во соопштението, при што е прецизирано дека сослушувањата ќе се одржуваат од недела до среда секоја седмица.

Нетанјаху, кој е првиот израелски премиер обвинет за поткуп, измама и злоупотреба на довербата, ги негира сите обвиненија поднесени во 2019 година. Процесот, кој започна во 2020 година, беше постојано одложуван поради неговите службени обврски.

Претседателот на САД, Доналд Трамп, претходно упати повици до израелскиот претседател Ицак Херцог за помилување на Нетанјаху, со цел тој непречено да ги извршува должностите.

Во Израел за октомври се закажани парламентарни избори на кои, според анкетите, коалицијата на Нетанјаху би можела да ја изгуби власта.

МИА