Во домот на напаѓачот кој во своето поранешно училиште во Грац уби десет лица, а потоа изврши самоубиство, истражните тимови пронајдоа проштално писмо и нефункционална цевна бомба, соопшти денеска локалната полиција.

На жртвите на трагедијата денеска им се оддава почит со едноминутно молчење, а вчерашниот напад врз гимназијата во Грац се смета за најсмртоносниот во Австрија по Втората светска војна.

Напаѓачот, 21-годишен маж од околината на Грац, бил поранешен ученик во училиштето каде го извршил масовното убиство, но никогаш не го завршил школувањето таму. Според полицијата, тој користел две оружја – пушка и пиштол – за кои се тврди дека ги поседувал легално.

Полициски службеник синоќа потврди дека во домот на напаѓачот е пронајдено писмо адресирано до неговите родители, но тоа не им овозможило на властите да извлечат заклучоци за мотивите на нападот.

Директорот за јавна безбедност во Министерството за внатрешни работи на Австрија, Франц Руф, за телевизијата „ОРФ“ изјави дека сè уште не е познато дали напаѓачот ги избирал жртвите намерно или случајно, а истрагата за тоа продолжува. Тој додаде дека повредените лица биле пронајдени на повеќе локации во училиштето, вклучително и едно лице пред зградата.