Од Меѓународниот аеродром Скопје вечерва стартуваа првите летови за Барселона и за Лион на нискобуџетната авиокомпанија „Виз ер“. Како што информира ТАВ Македонија, за Барселона полетаа 161 патник, а за Лион 180.

На релацијата Скопје – Барселона – Скопје, „Виз ер“ ќе лета секој вторник и сабота, додека летовите до Лион ќе се одвиваат три пати неделно, секој вторник, четврток и сабота.

-Со ова се исполни повеќегодишното барање за враќање на директната авиоврска меѓу Скопје и Барселона, на големо задоволство на сите вљубеници во овој град на уметноста, историјата, архитектурата и спортот. Истовремено, благодарение на „Виз ер“, за граѓаните се отвори сосема нова туристичка дестинација од Меѓународниот аеродром Скопје, францускиот град Лион, еден од најголемите гастрономски центри во светот, кој важи за срцето на француската кујна, наведува ТАВ Македонија.

Авиобилетите се достапни и може да се резервираат на https://www.wizzair.com/.

Најмалку седум луѓе загинаа, а 20 се повредени во бомбардирање на болница и аптека во Јужен Судан, соопшти денеска хуманитарната организација „Лекари без граници“.

Локалната полиција соопшти дека меѓу загинатите има и дете.

Болницата се наоѓа во градот Стари Фангак, околу 475 километри од главниот град Џуба.

Организацијата на социјалната мрежа Икс го осуди нападот врз болницата и додаде дека болницата е „единствениот извор на медицинска грижа за околу 40.000 жители“ и дека нападот е „јасно кршење на меѓународното право“.

Останува нејасно зошто болницата била цел на напад за кој се претпоставува дека го извршила армијата на Јужен Судан. Армијата не даде коментар.

Поставен камен-темелник на автопатот Тетово-Гостивар долг 18 километри. Проектот чини 90 милиони евра. Делницата треба да биде готова за две и пол години. Прoeктот предвидува шест сообраќајни ленти, три во секој правец, односно две за возење и една за застанување. Ќе се градат и девет натпатници.

Бехтел и Енка, пак, бара работници. Потребни им се камионџии, управувачи на машини, армирачи, градежни инженери.

На настанот присутна беше и американската амбасадорка Агелер.

Од СДСМ обвинија дека ВМРО-ДПМНЕ се лицемерни.

„Токму проектот со „Бехтел и Енка“ што тие со месеци го оцрнуваа, го блокираа и го нарекуваа „историски криминал“, денес со гордост го промовираат. Ако е „историски криминал“ дали тоа значи дека ВМРО-ДПМНЕ влегува во криминал? Едно е јасно, лицемерието на ДПМНЕ нема граници, но сепак добро е што продолжува реализацијата на стратешки проект на СДСМ“, пишуваат од опозицијата.

„Кој и да ги пишува соопштенијата и реакциите на СДС, сигурно е нов во работата и не замеруваме и никој не треба да замери, сепак што би можеле да кажат во своја одбрана што освен што немаа проект, тие два-три што ги почнаа или се коруптивни или заглавени и блокирани или и двете“ им вратија од ВМРО-ДПМНЕ.

Неколку региони на туристичкиот остров Бали во Индонезија денеска останаа без струја, а во тек се напори за обновување на снабдувањето со електрична енергија, објави државната енергетска компанија „Перусахаан Листрик Негара“ (PLN).

Британските медиуми пренесуваат дека и аеродромот на островот, исто така, е зафатен од недостиг на струја, но влезните и појдовните летови продолжија да работат, објави аеродромскиот оператор на својот профил на Инстаграм.

ПЛН соопшти дека ја истражува причината за прекинот на електричната енергија и дека работи на обновување на системот.

„Процесот на закрепнување во моментов се спроведува постепено“, рече портпаролот на PLN во Бали.

Сликите објавени на социјалните мрежи покажуваат сообраќаен метеж во Бали како резултат на прекинот на електричната енергија, како и долги редици во чекалниците на аеродромот.

Бали е главната туристичка дестинација во Индонезија, со 6,3 милиони странски посетители минатата година, покажуваат податоците на Заводот за статистика на Индонезија.

Забрана за поставување шатори и паркирање приколки, полуприколки и кампери на археолошки локалитети, крајбрежни делови, плажи, на рабови на јавни шуми и општо на јавни простори, предвидува меѓу другото, закон што од јануари годинава е во сила во Грција, а во спротивно предвидени се казни, јави дописничката на МИА од Атина.

За прекршувањето на законот предвидена е казна затвор до три месеци или парична казна од 300 евра по лице или по шатор или по превозно средство, изречена од полицијата или крајбрежната служба што го потврдува прекршокот.

– При контрола од страна на мешани тимови, казната ја изрекува полицаецот кој бил присутен за време на проверката. При паркирање на горенаведените возила, онаму каде што е дозволено согласно Законот за безбедност во сообраќајот, не е дозволено да се зафаќа дополнителен простор за возилото, пишува во конкретниот член од законот.

Исто така забрането е бесплатното сместување на повеќе од еден кампер од страна на приватни лица.

Законот иако беше изгласан на крајот на јануари, во Грција се актуализираше во изминатите денови откако минатиот викенд на Пелопонез тројца кампери добиле казната од 300 евра за непрописно паркирање на бесплатен јавен општински паркинг на кој, според медиумите, немало никаква ознака со која се забранува паркирање на кампери во оваа област.

За случајот реагираа од Грчкиот клуб на кампери, со оглед на тоа што казнетите се нивни членови, а Управниот одбор одлучил во соработка со правниот застапник да изготват писмо до надлежните министри за туризам и транспорт со барање за дополнително појаснување на спорниот член 27 од законот, а прашањето ќе го покренат и во Парламентот.

Дополнително, врз основа на одговорите што ќе ги добијат, ќе ги одредат нивните следни чекори и доколку е потребно ќе свикаат и вонредно Генерално собрание.

Неколку лица се тешко повредени кога автомобил удри во група луѓе во југозападниот германски град Штутгарт, соопшти вечерва пожарникарската бригада на X.

Возачот на возилото е приведен, изјави портпаролка на полицијата, пренесе ДПА.

Додека пожарникарската бригада го опиша инцидентот како несреќа, полицијата досега не коментираше за контекстот на судирот.

Инцидентот се случил на трамвајската станица Олгаек во центарот на градот.

Пожарникари, спасувачи и полиција се на местото на настанот, кое е обезбедено.

Според портпаролката на полицијата, сообраќајот на станицата е во прекин.

Таа додаде дека во моментов се испрашуваат сведоци.

Возилото кое учествувало во инцидентот било темен Мерцедес Г класа, луксузен теренец.

Грег Попович се повлекува од функцијата главен тренер на Сан Антонио Спарс и ќе ја преземе функцијата претседател на кошаркарските операции во клубот, објави Националната кошаркарска асоцијација на САД и Канада (НБА).

Попович (76) кој има најмногу победи како тренер во историјата на НБА, доживеа благ мозочен удар минатиот ноември и не се врати на работа до крајот на сезоната.

– Иако мојата љубов и страст кон играта остануваат, решив дека е време да се повлечам од функцијата главен тренер. Засекогаш ќе им бидам благодарен на прекрасните играчи, тренери, персонал и навивачи кои ми дозволија да им служам како главен тренер на Спарс, и сум воодушевен што имам можност да продолжам да ја поддржувам организацијата, заедницата и градот кои ми се толку важни, изјави тренерот.

Попович е трикратен тренер на годината во НБА. Тој ги предводеше Сан Антонио Спарс до пет шампионски титули (1999, 2003, 2005, 2007, 2014), а машката репрезентација на САД до златен медал на Олимписките игри во Токио во 2021 година.

Попович беше примен во Кошаркарската куќа на славните како тренер во 2023 година.

Стручњакот ја презеде тренерската позиција во Сан Антонио во 1996 година и го претвори тимот во еден од најуспешните во НБА. 

Платформата ТикТок е казнета со 530 милиони евра (601 милион долари) за кршење на правилата на ЕУ за заштита на лични податоци со пренесување податоци во Кина, соопшти денеска ирскиот регулатор. 

Ирската комисија за заштита на податоци соопшти дека ТикТок ја прекршил Општата регулатива за заштита на податоци на Европската унија со споделување податоци за европски корисници со Кина и ги прекршил барањата за транспарентност на блокот. 

TикТок сè уште може да поднесе жалба на казната, во рамки на која се бара апликацијата да ја прилагоди својата обработка на податоци за да се усогласи со правилата на ЕУ во рок од шест месеци. 

За време на истрагата, апликацијата за споделување видеа изјави дека не складирала никакви податоци за корисници од Европа на сервери во Кина, но во април призна дека ова се случило во ограничен обем, соопшти Ирската комисија за заштита на податоци.