Пратеничката група на СДСМ предлага законско решение со кое работодавачите во приватниот сектор ќе можат да ги зголемат платите на своите вработени за износ од 3.000 до 15.000 денари, без да мора да плаќаат придонеси за тој зголемен дел, соопшти денеска пратеничката Сања Лукаревска.
– Се соочуваме со реален проблем, платите сè уште се ниски, а трошоците за живот постојано растат. Работниците се борат да врзат крај со крај, а многу од нив размислуваат да ја напуштат државата во потрага по подобри услови. Од друга страна, и работодавачите сакаат да ги зголемат платите, но честопати не можат поради високите придонеси кои мора да ги плаќаат. Затоа, пратеничката група на СДСМ предлага законско решение кое ќе им помогне и на работниците и на компаниите, а ќе обезбеди и дополнителни приходи во буџетот – рече Лукаревска.
Таа најави дека СДСМ ќе го достави законот до Собранието.
– Како се пресметуваат придонесите? Придонесите за пензиско, здравствено и социјално осигурување се замрзнуваат на просекот од последните три исплатени плати на работникот.
Ова замрзнување важи во период од една година, што значи дека работодавачите ќе немаат дополнителен финансиски товар при зголемување на платите. Кои компании, за кои работници може да добијат ослободување? За работници за кои компаниите исплаќаат нето плата која не е повисока од 65.380 денари. Вакви работници има околу 400.000, кои би можеле да добијат повисоки примања, без зголемени трошоци за компаниите – вели Лукаревска.
Ако просечното зголемување на платата биде 7.500 денари за 400.000 вработени, тогаш вкупното покачување на платите на национално ниво би било 585 милиони евра, додаде таа.
– Иако работодавачите нема да плаќаат придонеси за ова зголемување, тие сè уште ќе плаќаат данок на личен доход (10%), што значи дека во државниот буџет ќе се слеат 58,5 милиони евра дополнителни приходи од данок на личен доход. Во реалноста, сето ова значи работниците да добиваат поголеми плати, компаниите да не се оптоваруваат со дополнителни трошоци, а државата добива повисоки приходи, без да воведе нови даноци или да зголеми буџетски трошоци. Оваа мерка е паметна, правична и издржана. Го поттикнува растот на платите, ја зајакнува економијата и создава стабилност и сигурност за работниците и компаниите. Го повикуваме парламентарното мнозинство и Владата да го поддржат овој закон – рече пратеничката Лукаревска.
Нема никаква оправдување зошто ова законско решение не би било изгласано, додаде таа.
Прочитајте ја целата статија од изворот