Министерот за финансии на САД, Скот Бесент, излезе пред јавноста со цел да ги објасни забелешките на американскиот претседател Доналд Трамп во врска со новите трговски давачки.

Трамп неодамна објави повисоки давачки за Кина, но и замрзнување на давачките на 10 проценти во текот на 90 дена за сите други држави.

Бесент изјави дека САД се спремни да дискутираат со „секоја земја во светот“ која има желба да разговара за трговските услови.

“Ќе преминеме на основна давачка од 10 проценти за тие земји,” изјави тој, дополнувајќи дека давачките за Кина ќе бидат зголемени на 125 проценти поради, како што рече, “нивното инсистирање на ескалација”.

Според Бесент, повеќе од 75 држави веќе стапиле во контакт со САД за да разговараат за условите, а Вашингтон е подготвен да преговара „во добра верба“. Тој истакна дека 90-дневната суспензија, најавена од Трамп, ќе овозможи време за овие разговори.

Оваа неочекувана измена во политиката на Трамп доаѓа помалку од 24 часа откако стапија во сила високите давачки за увоз од многубројни трговски соработници.