Рускиот претседател Владимир Путин и претседателот на САД Доналд Трамп денеска телефонски разговарале за судирот меѓу Иран и Израел, соопшти високиот советник за надворешна политика на Кремљ, Јуриј Ушаков.

– Претседателот на Руската Федерација Владимир Владимирович Путин тукушто одржа уште еден телефонски разговор со претседателот на САД Доналд Трамп, изјави Ушаков. – Путин ја осуди воената операција на Израел против Иран и изрази сериозна загриженост од можната ескалација на конфликтот, која би имала непредвидливи последици за целиот регион на Блискиот Исток, додаде тој.

Путин, според Ушаков, го информирал Трамп за вчерашните телефонски разговори што ги имал со израелскиот премиер Бенјамин Нетанјаху и иранскиот претседател Масуд Пезешкијан.

Во разговорот била нагласена подготвеноста на Русија за евентуално посредништво. Исто така, Путин ја потврдил подготвеноста на Москва да продолжи со преговорите со Украина по 22 јуни.

– Руската страна изрази подготвеност да ги продолжи преговорите со Украинците, како што е договорено, по 22 јуни. Доналд Трамп ја прими таа информација и го потврди интересот за ставање крај на руско-украинскиот конфликт во можно најкраток рок, наведе Ушаков.

Двајцата лидери изразиле задоволство од воспоставените лични односи, кои овозможуваат ефективна комуникација и заедничко барање решенија за итните прашања, без оглед на нивната сложеност.

Ова е петти телефонски разговор меѓу Путин и Трамп откако американскиот претседател се врати во Белата куќа. Последниот разговор беше на 4 јуни, а денешниот траел околу 50 минути.