Вишото јавно обвинителство во Белград денеска соопшти дека поднело барање до полицијата за собирање информации и проверка на „точност на информации“ за наводни контакти меѓу Белградскиот универзитет и Воениот синдикат, јави МИА од Белград.
Според аудио снимка објавена од провладини медиуми, „извесна М.В изнела информации дека еден од претставниците на Универзитетот во Белград контактирал со Воениот синдикат и дека – Војската на Србија ќе застане на страната на демонстрантите доколку дојде до немири“.
„На полицијата и е наредено да ја провери точноста на информациите поврзани со Универзитетот во Белград, особено во врска со меѓусебната комуникација меѓу тој универзитет и припадниците на војската на Србија, како и дали и кои членови на Универзитетот во Белград биле во контакт со Воениот синдикат“.
Обвкнителството бара да се испита дали постојат елементи за кривичното дело „Повикување на насилна промена на уставниот поредок“ или друго кривично дело за кое кривично гонење се презема по службена должност.
