Истрагата за Димитровска за оддавање службена тајна е силен удар за угледот на Антикорупциска, велат познавачите. Според еден од поранешните претседатели на ДКСК, Драган Малиновски, довербата во оваа институција низ годините била подложна на доста осцилации „нагоре-надолу“, состојбата е кревка и треба да се внимава со секој потег за тоа каков впечаток ќе остави кај граѓаните за својата работа.
„Ова е дефинитивно многу силен удар на комисијата во целина. Јас би рекол и удар генерално во борбата против корупцијата во државата, бидејќи Антикорупциската комисија институционално е поставена како двигател кој треба да дава интонација, темпо, во борбата против корупцијата. Ова е навистина многу сериозен удар“ – Драган Малиновски, поранешен претседател на ДКСК
Малиновски се сомнева дека Антикорупциска ќе може да продолжи да работи со темпо како да не се случило ништо. Тој смета дека сега најважно е да реагира Собранието.
„Се сомневам. Никој не може да го избрише впечатокот или ефектот што се постигна со вчерашната „епизода“ со претседателката. Лично сметам дека со овој проблем или со оваа работа час поскоро ќе треба да се позанимава Собранието на Република Македонија како институција која ја избира и следи работата на Антикорупциска, па има можност и да реагира во вакви ситуации“ – Драган Малиновски, поранешен претседател на ДКСК
Димитровска лани доби дипломатски пасош од Министерството за надворешни работи за да може да патува без чекање во ред за пасошка контрола со останатите граѓани при напуштање и при влез во Македонија. Останатите 6 члена исто така побараа, но не добија таква привилегија. Првиот човек на МНР, кој беше гостин во тема на денот, рече дека тоа што Димитровска има дипломатски пасош, не значи дека има посебен имунитет. Според него, логично е таа од етички и морални причини да си даде оставка.
„Самиот дипломатски пасош на наш граѓанин не значи дека тој ужива било какви права поврзани со некоја форма на имунитет. Што значи дека истиот не може да влијае на самата постапка која се спроведува од нашите органи и во моментот кога ќе престане функцијата на таа поединечна личност, секако МНР ќе го одземе тој дипломатски пасош. Логично е кога сте опфатени со ваков тип на постапка, почитувајќи ја и презумпцијата на невиност, ова го велам пред се како човек, не како министер, логично е дадете оставка. Тоа не треба, според мене, да влијае на кредибилитетот на сите останати членови на таа комисија“ – Тимчо Муцунски, министер за надворешни работи
Сегашниот состав на Антикорупциска почна со работа лани во февруари и има мандат до 2029 година.
