Јавното обвинителство со денови молчи и не презема никакви дејствија во врска со сериозните сомнежи за криминал и финансиски трансакции, вредни милионски суми, кои завршиле во бугарски фирми поврзани со кланот Заеви и со поранешниот министер за здравство, Венко Филипче, се наведува во соопштението на владејачката ВМРО-ДПМНЕ.
Од ВМРО-ДПМНЕ предупредуваат дека ниту СДСМ ниту Филипче не дале никакво објаснување во јавноста во врска со автомобилот „ауди Q8“, кој, се посочува во соопштението, му бил подарен на Филипче од фирмата „Зобек мининг груп“. Истата фирма, како што се наведува, добила тендер за набавка на јаглен за државната компанија ЕСМ.
Дополнително, според соопштението, Обвинителството молчи за, како што се наведува – „аудито“ вредно 130.000 евра – кое му било дадено на Филипче. Од ВМРО-ДПМНЕ велат дека е апсолутно невообичаено правно или физичко лице да подари вредност од 130.000 евра на некое лице со кое нема роднинска врска.
„А кога лице, кое нема роднинска поврзаност со друго лице, добива подарок од 130.000 евра, сосема јасно е дека станува збор или за затајување данок или за перење пари или за тргување со влијание,“ велат од ВМРО-ДПМНЕ.
Од владејачката партија нагласуваат дека, кога станува збор за политичар, пратеник и за актуелен лидер на опозициска партија, тогаш „сосема е јасно дека се крие нешто скриено“.
Во соопштението се посочува дека Јавното обвинителство веќе води постапка за идентичен случај – против Пеце Мирчевски, поранешен директор на Секторот за оперативно управување со кризи (СОЗР) во време на СДСМ. Мирчевски, се вели во соопштението, се терети дека добил 2 автомобила од фирма што добивала тендери и за тоа е обвинет за несовесно работење во службата, по член 353-в, став 3 во врска со ставовите 2 и 1 од Кривичниот законик.
„Зошто ЈО молчи за Филипче? Дали затоа што е претседател на СДСМ, па има повластен третман?“ прашуваат од ВМРО-ДПМНЕ, додавајќи: „Која е причината за двојни аршини – идентичен случај, а различен третман во однос на подарокот на Мирчевски и подарокот ‘ауди’ на Филипче? Со што Филипче ги уценува ЈО за да не постапуваат?“
Владејачката партија бара итно отворање на постапка од страна на Јавното обвинителство и предупредува дека во спротивно ќе биде „премногу јасно и очигледно дека институцијата работи исклучиво во интерес на Филипче и на СДСМ“.
The post ЗОШТО ЈАВНОТО ОБВИНИТЕЛСТВО ГО ГОНИ МИРЧЕВСКИ, А МОЛЧИ ЗА „АУДИТО“ НА ФИЛИПЧЕ? Од ВМРО-ДПМНЕ обвинуваат за двојни аршини appeared first on plusinfo.mk.
Прочитајте ја целата статија од изворот