Штипското обвинителство води истрага против 5 лица за убиството на турски студент во Штип, соопштија оттаму. за сите осомничени се бара притвор.
Според соопштението од Обвинителството, првоосомничениот е директен извршител на кривично дело „убиство“, а се гони и за  „неовластено изработување, држење, посредување и тргување со оружје или експлозивни материи“. Останатите  четворица се осомничени за „помагање на сторителот по извршено кривично дело“.
Сите осомничени се турски државјани, од кои тројца имале пријавено престојувалиште во Штип, додека извршителот на убиството и еден од помагачите биле без пријавен престој во државава.
„Постои основано сомнение дека првоосомничениот 21-годишник, на почетокот на месецов во Скопје, од непознато лице за сума од 1.100 евра купил пиштол со калибар од 9 милиметри, со избришани податоци за модел и сериски број. Потоа со тој пиштол, на 8 мај во вечерните часови, во кафе-бар во Штип, со умисла и од безобѕирна одмазда лишил од живот едно лице, исто така турски државјанин со престој во Штип“, се наведува во соопштението.
Според Обвинителството, првоосомничениот преку мобилни апликации се договориле со жртвата да се сретнат за наводно да ги надминат долготрајните недоразбирања меѓу нив, но, по 15-минутен разговор во угостителскиот објект, осомничениот влегол во тоалетот и веднаш излегол, па на вратата која го дели отворениот од затворениот дел од кафулето го извадил пиштолот и испукал неколку куршуми во правец на оштетениот, нанесувајќи му повеќе огнострелни повреди од кои подоцна починал.
Истата вечер, останатите четворица осомничени – тројца мажи и една жена, сите на возраст од 22 до 28 години, му помогнале на сторителот по извршеното кривично дело за кое е запретена казна доживотен затвор.
„На точно неутврдена локација во Штип го качиле во автомобил БМВ со кој управувала осомничената девојка и сите заедно се упатиле кон Скопје. Кај наплатната станица Миладиновци на автопатот Штип-Скопје биле пресретнати и запрени од полициска патрола и се дале во бегство, но биле уапсени“, се појаснува во соопштението.
Јавниот обвинител побарал  притвор за осомничените.
The post ИСТРАГА ПРОТИВ 5 ЛИЦА ЗА УБИСТВОТО ВО ШТИП Убиецот купил пиштол во Скопје и тргнал во одмазда appeared first on plusinfo.mk.
Прочитајте ја целата статија од изворот