Русија секојдневно убива цивили и нема да застане додека не биде запрена, се оценува во соопштението на украинското Министерство за надворешни работи по денешниот воздушен напад врз градот Запорожје.

Според регионалната воена администрација, руската авијација денеска околу 11:30 часот фрлила две наведувани бомби врз градот. Едната погодила инфраструктурен објект, а другата паднала врз станбена зграда во густо населен кварт.

До 16:00 часот, според гувернерот Иван Федоров, една жена е загината, а повредени се 26 лица, меѓу кои четири деца – на возраст од 16, 14, 4 и 3 години. Четиринаесетгодишно момче е во тешка состојба.